Kulturrådets ærespris til Dissimilis

Kulturrådet har sidan 1968 delt ut ein ærespris for ein innsats av vesentleg betydning for norsk kunst- og kulturliv. Æresprisen er ei anerkjenning av menneske og organisasjonar som har gitt oss noko som varer.

– Eit samstemt kulturråd er glade for å gi årets ærespris til ein organisasjon som har vore med på å forme menneskesynet i Noreg og som bidreg til eit rikare og meir mangfaldig samfunn, sa Sigmund Løvåsen, rådsleiar i Kulturrådet.

Sigmund Løvåsen, rådsleiar, delte ut statuett og diplom til generalsekretær Nathalie Sturim i Dissimilis. Foto: Haugen Media – Emma Lisa Haugen og Åsmund Groven

Nathalie Sturim, generalsekretær i Dissimilis, tok imot prisen og heldt ei takketale på vegner av organisasjonen.

– I dag får Alf Prøysen, Mari Boine, Arve Tellefsen og Anne-Cath. Vestli, mellom andre, selskap av Dissimilis Norge, sa generalsekretæren til applaus frå salen. – Dette er eit tydeleg signal om at det Dissimilis Norge gjer, er kultur av aller høgste kvalitet. Punktum.

– Kjære kulturråd. I Dissimilis Norge arbeider vi for eit rikare kulturelt samfunn og for å sjå alle. I dag er det vi som kjenner oss sette. Tusen takk, sa ho.

Prinsesse Astrid er beskyttar for Dissimilis og var til stades på utdelingen på Riksscenen i Oslo måndag kveld. Foto: Haugen Media – Emma Lisa Haugen og Åsmund Groven

Historia

Dissimilis arbeider for at menneske med utviklingshemming og funksjonsnedsetjingar skal ha ein plass i kulturlivet som likestilte utøvarar og medmenneske.

Historia til Dissimilis starta tidleg på 1980-talet. Kai Zahl starta bandet Blostoppbandet for at sonen Børge skulle få spele i band. Med musikalen “Dissimilis – en annerledes musikal”, sett opp i 1987, vart namnet etablert. Etter kvart voks det fram stadig fleire Dissimilis-grupper rundt om i landet. I 1992 vart paraplyorganisasjonen Dissimilis Norge stifta, og i 1994 kom Dissimilis nasjonale kompetansesenter.

Musikkinnslag frå Dissimilis. Foto: Haugen Media – Emma Lisa Haugen og Åsmund Groven

I dag har organisasjonen 130 lokale grupper med til saman 1200 medlemmar over heile landet. Dei driv band, dansekompani, teatergrupper og andre kunstnariske uttrykk.

Prinsesse Astrid har vore beskyttar for Dissimilis sidan 1995 og til stades på dei fleste av dei årlege juleframsyningane.

Kulturrådets ærespris

Vinnaren av æresprisen får 700 000 kroner og ein løvestatuett laga av bilethoggaren Elena Engelsen.