Avduka monumentet «Fjordafolket»

Dronning Sonja takka Storfjordens Venner for eit fantastisk frivillig arbeid som har vore lagt ned gjennom 50 år.

– De har ikkje berre redda viktige kulturminne. De har òg gjort det litt lettare for besøkande – slike som meg – å kome seg opp på fjellhyllene og oppleve desse stadene – og skapt minne for livet, sa Dronninga.

Dronning Sonja og Karl Mjelva avdukar skulpturen “Høybør” ved Norsk Fjordsenter. Foto: Liv Anette Luane, Det kongelege hoffet

Styret i Storfjordens Venner vedtok i 2016 å heidre minnet om folket på fjord- og fjellgardane langs Storfjorden med eit monument. Resultatet vart tre skulpturar – «Mor med barn», «Slåttekar» og «Høybør». Dei tre skulpturane har fått samlenamnet «Fjordafolket» og vart avduka som ein del av jubileet. Skulpturane er laga av Ola Stavseng og står plasserte ved Norsk Fjordsenter.

Dronning Sonja avduka skulpturen «Høybør» saman med Karl Mjelva, initiativtakar til Storfjordens Venner og den første leiaren av foreininga.

Skulpturane er laga av kunstnaren Ola Stavseng og er ein hyllest til fjordfolket. Foto: Liv Anette Luane, Det kongelege hoffet

Laurdag kveld var Dronning Sonja til stades ved ein festmiddag på Hotel Union i Geiranger i høve 50-årsjubileet.

Kongeskipet Norge ligg inst i Geirangerfjorden under besøket. Den UNESCO-registrerte fjorden utgjer ein arm av Storfjorden. Foto: Liv Anette Luane, Det kongelege hoffet